శ్రీ సుదర్శన సహస్రనామ స్తోత్రం

కైలాసశిఖరే రమ్యే ముక్తామాణిక్యమండపే |
రత్నసింహాసనాసీనం ప్రమథైః పరివారితమ్ || 1 ||
భర్తారం సర్వధర్మజ్ఞం పార్వతీ పరమేశ్వరమ్ |
బద్ధాంజలిపుటా భూత్వా పప్రచ్ఛ వినయాన్వితా || 2 ||
పార్వత్యువాచ |
యత్ త్వయోక్తం జగన్నాథ సుభ్రుశం క్షేమమిచ్ఛతామ్ |
సౌదర్శనమృతే శాస్త్రం నాస్తి చాన్యదితి ప్రభో || 3 ||
తత్ర కాచిద్వివక్షాస్తి తమర్థం ప్రతి మే ప్రభో |
ఏవముక్తస్త్వహిర్బుద్ధ్న్యః పార్వతీం ప్రత్యువాచ తామ్ || 4 ||
అహిర్బుద్ధ్న్య ఉవాచ |
సంశయో యది తే తత్ర తం బ్రూహి త్వం వరాననే |
ఇత్యేవముక్తా గిరిజా గిరిశేన మహాత్మనా |
పునర్హోవాచ సర్వజ్ఞం జ్ఞానముద్రాధరం పతిమ్ || 5 ||
పార్వత్యువాచ |
లోకే సౌదర్శనం మంత్రం యంత్రం తత్తత్ ప్రయోగవత్ |
సర్వం విజ్ఞాతుమప్యత్ర యథావత్సమనుష్ఠితుమ్ || 6 ||
అతివేలమశక్తానాం తన్మార్గం భృశమిచ్ఛతామ్ |
కో మార్గః కా గతిస్తేషాం కార్యసిద్ధిః కథం భవేత్ |
ఏతన్మే బ్రూహి లోకేశ త్వదన్యః కో వదేదముమ్ || 7 ||
అహిర్బుద్ధ్న్య ఉవాచ |
అహం తే కథయిష్యామి సర్వసిద్ధికరం శుభమ్ |
అనాయాసేన యజ్జప్త్వా నరః సిద్ధిమవాప్నుయాత్ || 8 ||
తచ్చ సౌదర్శనం గుహ్యం దివ్యం నామసహస్రకమ్ |
నియమాత్పఠతాం నౄణాం చింతితార్థప్రదాయకమ్ || 9 ||
తస్య నామసహస్రస్య సోఽహమేవర్షిరీరితః |
ఛందోఽనుష్టుప్ దేవతా తు పరమాత్మా సుదర్శనః || 10 ||
స్రాం బీజం హ్రీం తు శక్తిః స్యాత్ శ్రీం కీలకముదాహృతమ్ |
సమస్తాభీష్టసిద్ధ్యర్థే వినియోగ ఉదాహృతః |
శంఖం చక్రం చ చాపాది ధ్యానమస్య సమీరితమ్ || 11 ||
అథ ధ్యానమ్ |
శంఖం చక్రం చ చాపం పరశుమసిమిషుం శూలపాశాంకుశాగ్నిం
బిభ్రాణం వజ్రఖేటౌ హలముసలగదాకుంతమత్యుగ్రదంష్ట్రమ్ |
జ్వాలాకేశం త్రిణేత్రం జ్వలదనలనిభం హారకేయూరభూషం
ధ్యాయేత్ షట్కోణసంస్థం సకలరిపుజనప్రాణసంహారచక్రమ్ ||
అథ స్తోత్రమ్ |
శ్రీచక్రః శ్రీకరః శ్రీశః శ్రీవిష్ణుః శ్రీవిభావనః |
శ్రీమదాంధ్యహరః శ్రీమాన్ శ్రీవత్సకృతలక్షణః || 1 ||
శ్రీనిధిః శ్రీవరః స్రగ్వీ శ్రీలక్ష్మీకరపూజితః |
శ్రీరతః శ్రీవిభుః సింధుకన్యాపతిరధోక్షజః || 2 ||
అచ్యుతశ్చాంబుజగ్రీవః సహస్రారః సనాతనః |
సమర్చితో వేదమూర్తిః సమతీతసురాగ్రజః || 3 ||
షట్కోణమధ్యగో వీరః సర్వగోఽష్టభుజః ప్రభుః |
చండవేగో భీమరవః శిపివిష్టార్చితో హరిః || 4 ||
శాశ్వతః సకలః శ్యామః శ్యామలః శకటార్దనః |
దైత్యారిః శారదఃస్కంధః శకటాక్షః శిరీషకః || 5 ||
శరభారిర్భక్తవశ్యః శశాంకో వామనోఽవ్యయః |
వరూథివారిజః కంజలోచనో వసుధాధిపః || 6 ||
వరేణ్యో వాహనోఽనంతః చక్రపాణిర్గదాగ్రజః |
గభీరో గోలవాధీశో గదాపాణిః సులోచనః || 7 ||
సహస్రాక్షశ్చతుర్బాహుః శంఖచక్రగదాధరః |
భీషణో భీతిదో భద్రో భీమోఽభీష్టఫలప్రదః || 8 ||
భీమార్చితో భీమసేనో భానువంశప్రకాశకః |
ప్రహ్లాదవరదః ఫాలలోచనో లోకపూజితః || 9 ||
ఉత్తరామానదో మానీ మానవాభీష్టసిద్ధిదః |
భక్తపాలః పాపహారీ ఫలదో దహనధ్వజః || 10 ||
అరీశః కనకో ధాతా కామపాలః పురాతనః |
అక్రూరః క్రూరజనకః క్రూరదంష్ట్రః కులాధిపః || 11 ||
క్రూరకర్మా క్రూరరూపీ క్రూరహారీ కుశేశయః |
మందరో మానినీకాంతో మధుహా మాధవప్రియః || 12 ||
సుప్రతప్తస్వర్ణరూపీ బాణాసురభుజాంతకృత్ |
ధరాధరో దానవారిః దనుజేంద్రారిపూజితః || 13 ||
భాగ్యప్రదో మహాసత్త్వో విశ్వాత్మా విగతజ్వరః |
సురాచార్యార్చితో వశ్యో వాసుదేవో వసుప్రదః || 14 ||
వసుంధరో వాయువేగో వరాహో వరుణాలయః |
ప్రణతార్తిహరః శ్రేష్ఠః శరణ్యః పాపనాశనః || 15 ||
పావకో వారణాద్రీశో వైకుంఠో వీతకల్మషః |
వజ్రదంష్ట్రో వజ్రనఖో వాయురూపీ నిరాశ్రయః || 16 ||
నిరీహో నిస్పృహో నిత్యో నీతిజ్ఞో నీతిభావనః |
నీరూపో నారదనుతో నకులాచలవాసకృత్ || 17 ||
నిత్యానందో బృహద్భానుః బృహదీశః పురాతనః |
నిధీనామధిపోఽనంతః నరకార్ణవతారకః || 18 ||
అగాధోఽవిరలోఽమర్త్యో జ్వాలాకేశః ఖగార్చితః |
తరుణస్తనుకృద్రక్తః పరమశ్చిత్తసంభవః || 19 ||
చింత్యః సత్యనిధిః సాగ్రశ్చిదానందః శివప్రియః |
శింశుమారః శతమఖః శాతకుంభనిభప్రభః || 20 ||
భోక్తారుణేశో బలవాన్ బాలగ్రహనివారకః |
సర్వారిష్టప్రశమనో మహాభయనివారకః || 21 ||
బంధుః సుబంధుః సుప్రీతః సంతుష్టః సురసన్నుతః |
బీజకేశ్యో భగో భానుః అమితార్చిరపాం పతిః || 22 ||
సుయజ్ఞో జ్యోతిషః శాంతో విరూపాక్షః సురేశ్వరః |
వహ్నిప్రాకారసంవీతో రత్నగర్భః ప్రభాకరః || 23 ||
సుశీలః సుభగః స్వక్షః సుముఖః సుఖదః సుఖీ |
మహాసురశిరశ్ఛేతా పాకశాసనవందితః || 24 ||
శతమూర్తిః సహస్రారిః హిరణ్యజ్యోతిరవ్యయః |
మండలీ మండలాకారః చంద్రసూర్యాగ్నిలోచనః || 25 ||
ప్రభంజనస్తీక్ష్ణధారః ప్రశాంతః శారదప్రియః |
భక్షప్రియో బలిహరో లావణ్యో లక్షణప్రియః || 26 ||
విమలో దుర్లభః సౌమ్యః సులభో భీమవిక్రమః |
జితమన్యుర్జితారాతిః మహాక్షో భృగుపూజితః || 27 ||
తత్త్వరూపస్తత్త్వవేదీ సర్వతత్త్వప్రతిష్ఠితః |
భావజ్ఞో బంధుజనకో దీనబంధుః పురాణవిత్ || 28 ||
శస్త్రేశో నిర్మదో నేతా నరో నానాసురప్రియః |
నాభిచక్రో నతామిత్రో నదీశకరపూజితః || 29 ||
దమనః కాలికః కర్మీ కాంతః కాలార్దనః కవిః |
కమనీయకృతిః కాలః కమలాసనసేవితః || 30 ||
కృపాలుః కపిలః కామీ కామితార్థప్రదాయకః |
ధర్మసేతుర్ధర్మపాలో ధర్మీ ధర్మమయః పరః || 31 ||
ధాతానందమయో దివ్యో బ్రహ్మరూపీ ప్రకాశకృత్ |
సర్వయజ్ఞమయో యజ్ఞో యజ్ఞభుగ్యజ్ఞభావనః || 32 ||
జ్వాలాజిహ్మః శిఖామౌళిః సురకార్యప్రవర్తకః |
కలాధారః సురారిఘ్నః కోపహా కాలరూపభృత్ || 33 ||
వహ్నిధ్వజో వహ్నిసఖో వంజుళద్రుమమూలగః |
దక్షహా దానకారీ చ నరో నారాయణప్రియః || 34 ||
దైత్యదండధరో దాంతః శుభ్రాంగః శుభదాయకః |
లోహితాక్షో మహారౌద్రో మాయారూపధరః ఖగః || 35 ||
ఉన్నతో భానుజః సాంగో మహాచక్రః పరాక్రమీ |
అగ్నీశోఽగ్నిమయస్త్వగ్నిలోచనోఽగ్నిసమప్రభః || 36 ||
అగ్నివానగ్నిరసనో యుద్ధసేవీ రవిప్రియః |
ఆశ్రితాఘౌఘవిధ్వంసీ నిత్యానందప్రదాయకః || 37 ||
అసురఘ్నో మహాబాహుః భీమకర్మా శుభప్రదః |
శశాంకప్రణవాధారః సమస్తాశీవిషాపహః || 38 ||
అర్కో వితర్కో విమలో బిలగో బాదరాయణః |
బధిరఘ్నశ్చక్రవాళః షట్కోణాంతర్గతః శిఖీ || 39 ||
ధృఢధన్వా షోడశాక్షో దీర్ఘబాహుర్దరీముఖః |
ప్రసన్నో వామజనకో నిమ్నో నీతికరః శుచిః || 40 ||
నరభేదీ సింహరూపీ పురాధీశః పురందరః |
రవిస్తుతో యూథపాలో యుథపారిః సతాం గతిః || 41 ||
హృషీకేశో ద్విత్రిమూర్తిః ద్విరష్టాయుధభృద్వరః |
దివాకరో నిశానాథో దిలీపార్చితవిగ్రహః || 42 ||
ధన్వంతరిః శ్యామలారిః భక్తశోకవినాశకః |
రిపుప్రాణహరో జేతా శూరశ్చాతుర్యవిగ్రహః || 43 ||
విధాతా సచ్చిదానందః సర్వదుష్టనివారకః |
ఉల్కో మహోల్కో రక్తోల్కః సహస్రోల్కః శతార్చిషః || 44 ||
బుద్ధో బౌద్ధహరో బౌద్ధజనమోహో బుధాశ్రయః |
పూర్ణబోధః పూర్ణరూపః పూర్ణకామో మహాద్యుతిః || 45 ||
పూర్ణమంత్రః పూర్ణగాత్రః పూర్ణః షాడ్గుణ్యవిగ్రహః |
పూర్ణనేమిః పూర్ణనాభిః పూర్ణాశీ పూర్ణమానసః || 46 ||
పూర్ణసారః పూర్ణశక్తిః రంగసేవీ రణప్రియః |
పూరితాశోఽరిష్టతాతిః పూర్ణార్థః పూర్ణభూషణః || 47 ||
పద్మగర్భః పారిజాతః పరమిత్రః శరాకృతిః |
భూభృద్వపుః పుణ్యమూర్తిః భూభృతాం పతిరాశుగః || 48 ||
భాగ్యోదయో భక్తవశ్యో గిరిజావల్లభప్రియః |
గవిష్ఠో గజమానీ చ గమనాగమనప్రియః || 49 ||
బ్రహ్మచారీ బంధుమానీ సుప్రతీకః సువిక్రమః |
శంకరాభీష్టదో భవ్యః సాచివ్యః సవ్యలక్షణః || 50 ||
మహాహంసః సుఖకరో నాభాగతనయార్చితః |
కోటిసూర్యప్రభో దీప్తిః విద్యుత్కోటిసమప్రభః || 51 ||
వజ్రకల్పో వజ్రసారో వజ్రనిర్ఘాతనిస్వనః |
గిరీశమానదో మాన్యో నారాయణకరాలయః || 52 ||
అనిరుద్ధః పరామర్షీ ఉపేంద్రః పూర్ణవిగ్రహః |
ఆయుధేశః శతారిఘ్నః శమనః శతసైనికః || 53 ||
సర్వాసురవధోద్యుక్తః సూర్యదుర్మానభేదకః |
రాహువిప్లోషకారీ చ కాశీనగరదాహకః || 54 ||
పీయూషాంశుః పరం జ్యోతిః సంపూర్ణః క్రతుభుక్ప్రియః |
మాంధాతృవరదః శుద్ధో హరసేవ్యః శచీష్టదః || 55 ||
సహిష్ణుః బలభుగ్వీరో లోకభృల్లోకనాయకః |
దుర్వాసమునిదర్పఘ్నో జయదో విజయప్రియః || 56 ||
సురాధీశోఽసురారాతిః గోవిందకరభూషణః |
రథరూపీ రథాధీశః కాలచక్రః కృపానిధిః || 57 ||
చక్రరూపధరో విష్ణుః స్థూలసూక్ష్మః శిఖిప్రభః |
శరణాగతసంత్రాతా వేతాలారిర్మహాబలః || 58 ||
జ్ఞానదో వాక్పతిర్మానీ మహావేగో మహామణిః |
విద్యుత్కేశో విహారేశః పద్మయోనిశ్చతుర్భుజః || 59 ||
కామాత్మా కామదః కామీ కాలనేమిశిరోహరః |
శుభ్రః శుచిః శునాసీరః శుక్రమిత్రః శుభాననః || 60 ||
వృషకాయో వృషారాతిః వృషభేంద్రః సుపూజితః |
విశ్వంభరో వీతిహోత్రో వీర్యో విశ్వజనప్రియః || 61 ||
విశ్వకృద్విశ్వపో విశ్వహర్తా సాహసకర్మకృత్ |
బాణబాహుహరో జ్యోతిః పరాత్మా శోకనాశనః || 62 ||
విమలాధిపతిః పుణ్యో జ్ఞాతా జ్ఞేయః ప్రకాశకః |
మ్లేచ్ఛప్రహారీ దుష్టఘ్నః సూర్యమండలమధ్యగః || 63 ||
దిగంబరో వృషాద్రీశో వివిధాయుధరూపకః |
సత్వవాన్ సత్యవాగీశః సత్యధర్మపరాయణః || 64 ||
రుద్రప్రీతికరో రుద్రవరదో రుగ్విభేదకః |
నారాయణో నక్రభేదీ గజేంద్రపరిమోక్షకః || 65 ||
ధర్మప్రియః షడాధారో వేదాత్మా గుణసాగరః |
గదామిత్రః పృథుభుజో రసాతలవిభేదకః || 66 ||
తమోవైరీ మహాతేజాః మహారాజో మహాతపాః |
సమస్తారిహరః శాంతః క్రూరో యోగేశ్వరేశ్వరః || 67 ||
స్థవిరః స్వర్ణవర్ణాంగః శత్రుసైన్యవినాశకృత్ |
ప్రాజ్ఞో విశ్వతనుత్రాతా శ్రుతిస్మృతిమయః కృతీ || 68 ||
వ్యక్తావ్యక్తస్వరూపోంసః కాలచక్రః కలానిధిః |
మహాద్యుతిరమేయాత్మా వజ్రనేమిః ప్రభానిధిః || 69 ||
మహాస్ఫులింగధారార్చిః మహాయుద్ధకృదచ్యుతః |
కృతజ్ఞః సహనో వాగ్మీ జ్వాలామాలావిభూషకః || 70 ||
చతుర్ముఖనుతః శ్రీమాన్ భ్రాజిష్ణుర్భక్తవత్సలః |
చాతుర్యగమనశ్చక్రీ చతుర్వర్గప్రదాయకః || 71 ||
విచిత్రమాల్యాభరణః తీక్ష్ణధారః సురార్చితః |
యుగకృద్యుగపాలశ్చ యుగసంధిర్యుగాంతకృత్ || 72 ||
సుతీక్ష్ణారగణో గమ్యో బలిధ్వంసీ త్రిలోకపః |
త్రిణేత్రస్త్రిజగద్వంద్యః తృణీకృతమహాసురః || 73 ||
త్రికాలజ్ఞస్త్రిలోకజ్ఞః త్రినాభిస్త్రిజగత్ప్రభుః |
సర్వమంత్రమయో మంత్రః సర్వశత్రునిబర్హణః || 74 ||
సర్వగః సర్వవిత్సౌమ్యః సర్వలోకహితంకరః |
ఆదిమూలః సద్గుణాఢ్యో వరేణ్యస్త్రిగుణాత్మకః || 75 ||
ధ్యానగమ్యః కల్మషఘ్నః కలిగర్వప్రభేదకః |
కమనీయతనుత్రాణః కుండలీ మండితాననః || 76 ||
సుకుంఠీకృతచండేశః సుసంత్రస్థషడాననః |
విషాధీకృతవిఘ్నేశో విగతానందనందికః || 77 ||
మథితప్రమథవ్యూహః ప్రణతప్రమథాధిపః |
ప్రాణభిక్షాప్రదోఽనంతో లోకసాక్షీ మహాస్వనః || 78 ||
మేధావీ శాశ్వతోఽక్రూరః క్రూరకర్మాఽపరాజితః |
అరీ దృష్టోఽప్రమేయాత్మా సుందరః శత్రుతాపనః || 79 ||
యోగయోగీశ్వరాధీశో భక్తాభీష్టప్రపూరకః |
సర్వకామప్రదోఽచింత్యః శుభాంగః కులవర్ధనః || 80 ||
నిర్వికారోఽనంతరూపో నరనారాయణప్రియః |
మంత్రయంత్రస్వరూపాత్మా పరమంత్రప్రభేదకః || 81 ||
భూతవేతాళవిధ్వంసీ చండకూశ్మాండఖండనః |
శకలీకృతమారీచో భైరవగ్రహభేదకః || 82 ||
చూర్ణీకృతమహాభూతః కబలీకృతదుర్గ్రహః |
సుదుర్గ్రహో జంభభేదీ సూచీముఖనిషూదనః || 83 ||
వృకోదరబలోద్ధర్తా పురందరబలానుగః |
అప్రమేయబలః స్వామీ భక్తప్రీతివివర్ధనః || 84 ||
మహాభూతేశ్వరః శూరో నిత్యః శారదవిగ్రహః |
ధర్మాధ్యక్షో విధర్మఘ్నః సుధర్మస్థాపకః శివః || 85 ||
విధూమజ్వలనో భానుర్భానుమాన్ భాస్వతాం పతిః |
జగన్మోహనపాటీరః సర్వోపద్రవశోధకః || 86 ||
కులిశాభరణో జ్వాలావృతః సౌభాగ్యవర్ధనః |
గ్రహప్రధ్వంసకః స్వాత్మరక్షకో ధారణాత్మకః || 87 ||
సంతాపనో వజ్రసారః సుమేధాఽమృతసాగరః |
సంతానపంజరో బాణతాటంకో వజ్రమాలికః || 88 ||
మేఖలాగ్నిశిఖో వజ్రపంజరః ససురాంకుశః |
సర్వరోగప్రశమనో గాంధర్వవిశిఖాకృతిః || 89 ||
ప్రమోహమండలో భూతగ్రహశృంఖలకర్మకృత్ |
కలావృతో మహాశంకుదారణః శల్యచంద్రికః || 90 ||
చేతనోత్తారకః శల్యక్షుద్రోన్మూలనతత్పరః |
బంధనావరణః శల్యకృంతనో వజ్రకీలకః || 91 ||
ప్రతీకబంధనో జ్వాలామండలః శస్త్రదారకః |
ఇంద్రాక్షిమాలికః కృత్యాదండశ్చిత్తప్రభేదకః || 92 ||
గ్రహవాగురికః సర్వబంధనో వజ్రభేదకః |
లఘుసంతానసంకల్పో బద్ధగ్రహవిమోచనః || 93 ||
మౌలికాంచనసంధాతా విపక్షమతభేదకః |
దిగ్బంధనకరః సూచీముఖాగ్నిశ్చిత్తబంధకః || 94 ||
చోరాగ్నిమండలాకారః పరకంకాళమర్దనః |
తాంత్రికః శత్రువంశఘ్నో నానానిగళమోచకః || 95 ||
సమస్తలోకసారంగః సుమహావిషదూషణః |
సుమహామేరుకోదండః సర్వవశ్యకరేశ్వరః || 96 ||
నిఖిలాకర్షణపటుః సర్వసమ్మోహకర్మకృత్ |
సంస్తంభనకరః సర్వభూతోచ్చాటనతత్పరః || 97 ||
యక్షరక్షోగణధ్వంసీ మహాకృత్యాప్రదాహకః |
అహితామయకారీ చ ద్విషన్మారణకారకః || 98 ||
ఏకాయనగతామిత్రవిద్వేషణపరాయణః |
సర్వార్థసిద్ధిదో దాతా విధాతా విశ్వపాలకః || 99 ||
విరూపాక్షో మహావక్షాః వరిష్ఠో మాధవప్రియః |
అమిత్రకర్శనః శాంతః ప్రశాంతః ప్రణతార్తిహా || 100 ||
రమణీయో రణోత్సాహో రక్తాక్షో రణపండితః |
రణాంతకృద్రథాకారో రథాంగో రవిపూజితః || 101 ||
వీరహా వివిధాకారః వరుణారాధితో వశీ |
సర్వశత్రువధాకాంక్షీ శక్తిమాన్ భక్తమానదః || 102 ||
సర్వలోకధరః పుణ్యః పురుషః పురుషోత్తమః |
పురాణః పుండరీకాక్షః పరమర్మప్రభేదకః || 103 ||
వీరాసనగతో వర్మీ సర్వాధారో నిరంకుశః |
జగద్రక్షో జగన్మూర్తిః జగదానందవర్ధనః || 104 ||
శారదః శకటారాతిః శంకరః శకటాకృతిః |
విరక్తో రక్తవర్ణాఢ్యో రామసాయకరూపభృత్ || 105 ||
మహావరాహదంష్ట్రాత్మా నృసింహనఖరాత్మకః |
సమదృఙ్మోక్షదో వంద్యో విహారీ వీతకల్మషః || 106 ||
గంభీరో గర్భగో గోప్తా గభస్తీ గుహ్యకో గురుః |
శ్రీధరః శ్రీరతః శ్రాంతః శత్రుఘ్నః శత్రుగోచరః || 107 ||
పురాణో వితతో వీరః పవిత్రశ్చరణాహ్వయః |
మహాధీరో మహావీర్యో మహాబలపరాక్రమః || 108 ||
సువిగ్రహో విగ్రహఘ్నః సుమానీ మానదాయకః |
మాయీ మాయాపహో మంత్రీ మాన్యో మానవివర్ధనః || 109 ||
శత్రుసంహారకః శూరః శుక్రారిః శంకరార్చితః |
సర్వాధారః పరం జ్యోతిః ప్రాణః ప్రాణభృదచ్యుతః || 110 ||
చంద్రధామాఽప్రతిద్వంద్వః పరమాత్మా సుదుర్గమః |
విశుద్ధాత్మా మహాతేజాః పుణ్యశ్లోకః పురాణవిత్ || 111 ||
సమస్తజగదాధారో విజేతా విక్రమః క్రమః |
ఆదిదేవో ధ్రువోఽదృశ్యః సాత్వికః ప్రీతివర్ధనః || 112 ||
సర్వలోకాశ్రయః సేవ్యః సర్వాత్మా వంశవర్ధనః |
దురాధర్షః ప్రకాశాత్మా సర్వదృక్ సర్వవిత్సమః || 113 ||
సద్గతిః సత్వసంపన్నో నిత్యః సంకల్పకల్పకః |
వర్ణీ వాచస్పతిర్వాగ్మీ మహాశక్తిః కలానిధిః || 114 ||
అంతరిక్షగతిః కల్యః కలికాలుష్యమోచనః |
సత్యధర్మః ప్రసన్నాత్మా ప్రకృష్టో వ్యోమవాహనః || 115 ||
శితధారః శిఖీ రౌద్రో భద్రో రుద్రసుపూజితః |
దరీముఖారిర్జంభఘ్నో వీరహా వాసవప్రియః || 116 ||
దుస్తరః సుదురారోహో దుర్జ్ఞేయో దుష్టనిగ్రహః |
భూతావాసో భూతహంతా భూతేశో భూతభావనః || 117 ||
భావజ్ఞో భవరోగఘ్నో మనోవేగీ మహాభుజః |
సర్వదేవమయః కాంతః స్మృతిమాన్ సర్వపావనః || 118 ||
నీతిమాన్ సర్వజిత్ సౌమ్యో మహర్షిరపరాజితః |
రుద్రాంబరీషవరదో జితమాయః పురాతనః || 119 ||
అధ్యాత్మనిలయో భోక్తా సంపూర్ణః సర్వకామదః |
సత్యోఽక్షరో గభీరాత్మా విశ్వభర్తా మరీచిమాన్ || 120 ||
నిరంజనో జితప్రాంశుః అగ్నిగర్భోఽగ్నిగోచరః |
సర్వజిత్సంభవో విష్ణుః పూజ్యో మంత్రవిదగ్రియః || 121 ||
శతావర్తః కలానాథః కాలః కాలమయో హరిః |
అరూపో రూపసంపన్నో విశ్వరూపో విరూపకృత్ || 122 ||
స్వామ్యాత్మా సమరశ్లాఘీ సువ్రతో విజయాన్వితః |
చండఘ్నశ్చండకిరణః చతురశ్చారణప్రియః || 123 ||
పుణ్యకీర్తిః పరామర్షీ నృసింహో నాభిమధ్యగః |
యజ్ఞాత్మా యజ్ఞసంకల్పో యజ్ఞకేతుర్మహేశ్వరః || 124 ||
జితారిర్యజ్ఞనిలయః శరణ్యః శకటాకృతిః |
ఉత్తమోఽనుత్తమోఽనంగః సాంగః సర్వాంగశోభనః || 125 ||
కాలాగ్నిః కాలనేమిఘ్నః కామీ కారుణ్యసాగరః |
రమానందకరో రామో రజనీశాంతరస్థితః || 126 ||
సంవర్తః సమరాన్వేషీ ద్విషత్ప్రాణపరిగ్రహః |
మహాభిమానీ సంధాతా సర్వాధీశో మహాగురుః || 127 ||
సిద్ధః సర్వజగద్యోనిః సిద్ధార్థః సర్వసిద్ధిదః |
చతుర్వేదమయః శాస్తా సర్వశాస్త్రవిశారదః || 128 ||
తిరస్కృతార్కతేజస్కో భాస్కరారాధితః శుభః |
వ్యాపీ విశ్వంభరో వ్యగ్రః స్వయంజ్యోతిరనంతకృత్ || 129 ||
జయశీలో జయాకాంక్షీ జాతవేదో జయప్రదః |
కవిః కల్యాణదః కామ్యో మోక్షదో మోహనాకృతిః || 130 ||
కుంకుమారుణసర్వాంగః కమలాక్షః కవీశ్వరః |
సువిక్రమో నిష్కళంకో విష్వక్సేనో విహారకృత్ || 131 ||
కదంబాసురవిధ్వంసీ కేతనగ్రహదాహకః |
జుగుప్సఘ్నస్తీక్ష్ణధారో వైకుంఠభుజవాసకృత్ || 132 ||
సారజ్ఞః కరుణామూర్తిః వైష్ణవో విష్ణుభక్తిదః |
సుకృతజ్ఞో మహోదారో దుష్కృతఘ్నః సువిగ్రహః || 133 ||
సర్వాభీష్టప్రదోఽనంతో నిత్యానందగుణాకరః |
చక్రీ కుంతధరః ఖడ్గీ పరశ్వథధరోఽగ్నిభృత్ || 134 ||
ధృతాంకుశో దండధరః శక్తిహస్తః సుశంఖభృత్ |
ధన్వీ ధృతమహాపాశో హలీ ముసలభూషణః || 135 ||
గదాయుధధరో వజ్రీ మహాశూలలసద్భుజః |
సమస్తాయుధసంపూర్ణః సుదర్శనమహాప్రభుః || 136 ||
ఓం సుదర్శనమహాప్రభవ ఓం నమః ||
ఇతి సౌదర్శనం దివ్యం గుహ్యం నామసహస్రకమ్ |
సర్వసిద్ధికరం సర్వయంత్రమంత్రాత్మకం పరమ్ || 137 ||
ఏతన్నామసహస్రం తు నియమాద్యః పఠేత్సుధీః |
శృణోతి వా శ్రావయతి తస్య సిద్ధిః కరస్థితా || 138 ||
దైత్యానాం దేవశత్రూణాం దుర్జయానాం మహౌజసామ్ |
వినాశార్థమిదం దేవి హరేరాసాదితం మయా || 139 ||
శత్రుసంహారకమిదం సర్వదా జయవర్ధనమ్ |
జలశైలమహారణ్యదుర్గమేషు మహాపది || 140 ||
భయంకరేషు చాపత్సు సంప్రాప్తేషు మహత్సు చ |
యః సకృత్ పఠనం కుర్యాత్ తస్య నైవ భవేద్భయమ్ || 141 ||
బ్రహ్మఘ్నశ్చ పశుఘ్నశ్చ మాతాపితృవినిందకః |
దేవానాం దూషకశ్చాపి గురుతల్పగతోఽపి వా || 142 ||
జప్త్వా సకృదిమం స్తోత్రం ముచ్యతే సర్వకిల్బిషైః |
తిష్ఠన్ గచ్ఛన్ స్వపన్ భుంజన్ జాగ్రన్నపి హసన్నపి || 143 ||
[* సుదర్శన నృసింహేతి యో వదేత్తు సకృన్నరః |
స వై న లిప్యతే పాపైః భుక్తిం ముక్తిం చ విందతి | *]
ఆధయో వ్యాధయః సర్వే రోగా రోగాధిదేవతాః |
శీఘ్రం నశ్యంతి తే సర్వే పఠనాదస్య వై నృణామ్ || 144 ||
బహునాత్ర కిముక్తేన జప్త్వేదం మంత్రపుష్కలమ్ |
యత్ర మర్త్యశ్చరేత్తత్ర రక్షతి శ్రీసుదర్శనః || 145 ||
ఇతి శ్రీవిహగేశ్వర ఉత్తరఖండే ఉమామహేశ్వరసంవాదే మంత్రవిధానే శ్రీ సుదర్శన సహస్రనామ స్తోత్రమ్ ||

[download id=”398673″]