శ్రీ దత్తాత్రేయ మంత్రాత్మక శ్లోకాః
అనసూయాత్రిసంభూతో దత్తాత్రేయో దిగంబరః |
స్మర్తృగామీ స్వభక్తానాముద్ధర్తా భవ సంకటాత్ || 1 ||
దరిద్రవిప్రగేహే యః శాకం భుక్త్వోత్తమశ్రియమ్ |
దదౌ శ్రీదత్తదేవః స దారిద్ర్యాచ్ఛ్రీప్రదోఽవతు || 2 ||
దూరీకృత్య పిశాచార్తిం జీవయిత్వా మృతం సుతమ్ |
యోఽభూదభీష్టదః పాతు స నః సంతానవృద్ధికృత్ || 3 ||
జీవయామాస భర్తారం మృతం సత్యా హి మృత్యుహా |
మృత్యుంజయః స యోగీంద్రః సౌభాగ్యం మే ప్రయచ్ఛతు || 4 ||
అత్రేరాత్మప్రదానేన యో ముక్తో భగవాన్ ఋణాత్ |
దత్తాత్రేయం తమీశానం నమామి ఋణముక్తయే || 5 ||
జపేచ్ఛ్లోకమిమం దేవపిత్రర్షిపున్నృణాపహమ్ |
సోఽనృణో దత్తకృపయా పరంబ్రహ్మాధిగచ్ఛతి || 6 ||
అత్రిపుత్రో మహాతేజో దత్తాత్రేయో మహామునిః |
తస్య స్మరణమాత్రేణ సర్వపాపైః ప్రముచ్యతే || 7 ||
నమస్తే భగవన్ దేవ దత్తాత్రేయ జగత్ప్రభో |
సర్వబాధాప్రశమనం కురు శాంతిం ప్రయచ్ఛ మే || 8 ||
అనసూయాసుత శ్రీశ జనపాతకనాశన |
దిగంబర నమో నిత్యం తుభ్యం మే వరదో భవ || 9 ||
శ్రీవిష్ణోరవతారోఽయం దత్తాత్రేయో దిగంబరః |
మాలాకమండలూచ్ఛూలడమరూశంఖచక్రధృక్ || 10 ||
నమస్తే శారదే దేవి సరస్వతి మతిప్రదే |
వస త్వం మమ జిహ్వాగ్రే సర్వవిద్యాప్రదా భవ || 11 ||
దత్తాత్రేయం ప్రపద్యే శరణమనుదినం దీనబంధుం ముకుందం
నైర్గుణ్యే సన్నివిష్టం పథి పరమపదం బోధయంతం మునీనామ్ |
భస్మాభ్యంగం జటాభిః సులలితముకుటం దిక్పటం దివ్యరూపం
సహ్యాద్రౌ నిత్యవాసం ప్రముదితమమలం సద్గురుం చారుశీలమ్ || 12 ||
ఇతి శ్రీమత్పరమహంస పరివ్రాజకాచార్య శ్రీవాసుదేవానందసరస్వతీ విరచితం శ్రీ దత్తాత్రేయ మంత్రాత్మక శ్లోకాః |
[download id=”399532″]
