శ్రీ దత్త అపరాధ క్షమాపణ స్తోత్రం

దత్తాత్రేయం త్వాం నమామి ప్రసీద
త్వం సర్వాత్మా సర్వకర్తా న వేద |
కోఽప్యంతం తే సర్వదేవాధిదేవ
జ్ఞాతాజ్ఞాతాన్మేఽపరాధాన్ క్షమస్వ || 1 ||
త్వదుద్భవత్వాత్త్వదధీనధీత్వా-
-త్త్వమేవ మే వంద్య ఉపాస్య ఆత్మన్ |
అథాపి మౌఢ్యాత్ స్మరణం న తే మే
కృతం క్షమస్వ ప్రియకృన్మహాత్మన్ || 2 ||
భోగాపవర్గప్రదమార్తబంధుం
కారుణ్యసింధుం పరిహాయ బంధుమ్ |
హితాయ చాన్యం పరిమార్గయంతి
హా మాదృశో నష్టదృశో విమూఢాః || 3 ||
న మత్సమో యద్యపి పాపకర్తా
న త్వత్సమోఽథాపి హి పాపహర్తా |
న మత్సమోఽన్యో దయనీయ ఆర్య
న త్వత్సమః క్వాపి దయాలువర్యః || 4 ||
అనాథనాథోఽసి సుదీనబంధో
శ్రీశాఽనుకంపామృతపూర్ణసింధో |
త్వత్పాదభక్తిం తవ దాసదాస్యం
త్వదీయమంత్రార్థదృఢైకనిష్ఠామ్ || 5 ||
గురుస్మృతిం నిర్మలబుద్ధిమాధి-
-వ్యాధిక్షయం మే విజయం చ దేహి |
ఇష్టార్థసిద్ధిం వరలోకవశ్యం
ధనాన్నవృద్ధిం వరగోసమృద్ధిమ్ || 6 ||
పుత్రాదిలబ్ధిం మ ఉదారతాం చ
దేహీశ మే చాస్త్వభయ హి సర్వతః |
బ్రహ్మాగ్నిభూమ్యో నమ ఓషధీభ్యో
వాచే నమో వాక్పతయే చ విష్ణవే || 7 ||
శాంతాఽస్తు భూర్నః శివమంతరిక్షం
ద్యౌశ్చాఽభయం నోఽస్తు దిశః శివాశ్చ |
ఆపశ్చ విద్యుత్పరిపాంతు దేవాః
శం సర్వతో మేఽభయమస్తు శాంతిః || 8 ||
ఇతి శ్రీమద్వాసుదేవానందసరస్వతీ విరచితం శ్రీ దత్తాపరాధ క్షమాపణ స్తోత్రమ్ |

[download id=”399594″]