శ్రీ బాలా త్రిపురసుందరీ రక్షా స్తోత్రం
సర్వలోకైకజననీ సర్వాభీష్టఫలప్రదే |
రక్ష మాం క్షుద్రజాలేభ్యః పాతకేభ్యశ్చ సర్వదా || 1 ||
జగద్ధితే జగన్నేత్రి జగన్మాతర్జగన్మయే |
జగద్దురితజాలేభ్యో రక్ష మామహితం హర || 2 ||
వాఙ్మనః కాయకరణైర్జన్మాంతరశతార్జితమ్ |
పాపం నాశయ దేవేశి పాహి మాం కృపయాఽనిశమ్ || 3 ||
జన్మాంతరసహస్రేషు యత్కృతం దుష్కృతం మయా |
తన్నివారయ మాం పాహి శరణ్యే భక్తవత్సలే || 4 ||
మయా కృతాన్యశేషాణి మదీయైశ్చ కృతాని చ |
పాపాని నాశయస్వాద్య పాహి మాం పరదేవతే || 5 ||
జ్ఞానాజ్ఞానకృతైః పాపైః సాంప్రాప్తం దురితం క్షణాత్ |
నివారయ జగన్మాతరఖిలైరనివారితమ్ || 6 ||
అసత్కార్య నివృత్తిం చ సత్కార్యస్య ప్రవర్తనమ్ |
దేవతాత్మానుసంధానం దేహి మే పరమేశ్వరి || 7 ||
సర్వావరణవిద్యానాం సంధానేనానుచింతనమ్ |
దేశికాంఘ్రిస్మృతిం చైవ దేహి మే జగదీశ్వరి || 8 ||
అనుస్యూతపరబ్రహ్మానందామృతనిషేవణమ్ |
అత్యంతనిశ్చలం చిత్తం దేహి మే పరమేశ్వరి || 9 ||
సదాశివాద్యైర్ధాత్ర్యంతైః దేవతాభిర్మునీశ్వరైః |
ఉపాసితం పదం యత్తద్దేహి మే పరమేశ్వరి || 10 ||
ఇంద్రాదిభిరశేషైశ్చ దేవైరసురరాక్షసైః |
కృతం విఘ్నం నివార్యాశు కృపయా రక్ష రక్ష మామ్ || 11 ||
ఆత్మానమాత్మనః స్నిగ్ధమాశ్రితం పరిచారకమ్ |
ద్రవ్యదం బంధువర్గం చ దేవేశి పరిరక్ష నః || 12 ||
ఉపాసకస్య యో యో మే యథాశక్త్యనుకూలకృత్ |
సుహృదం రక్ష తం నిత్యం ద్విషంతమనుకూలయ || 13 ||
దైహికాదైహికాన్నానాహేతుకాత్కేవలాద్భయాత్ |
పాహి మాం ప్రణతాపత్తిభంజనే విశ్వలోచనే || 14 ||
నిత్యానందమయం సౌఖ్యం నిర్మలం నిరూపాధికమ్ |
దేహి మే నిశ్చలాం భక్తిం నిఖిలాభిష్టసిద్ధిదే || 15 ||
యన్మయా సకలోపాయైః కరణీయమితః పరమ్ |
తత్సర్వం బోధయస్వాంబ సర్వలోకహితే రతే || 16 ||
ప్రదేహి బుద్ధియోగం తం యేన త్వాముపయామ్యహమ్ |
కామానాం హృద్యసంరోహం దేహి మే కృపయేశ్వరి || 17 ||
భవాబ్ధౌ పతితం భీతమనాథం దీనమానసమ్ |
ఉద్ధృత్య కృపయా దేవి నిధేహి చరణాంబుజే || 18 ||
ఇతి శ్రీ బాలా రక్షా స్తోత్రమ్ |
[download id=”399692″]
