శ్రీ బాలా ముక్తావలీ స్తోత్రం
బాలార్కకోటిరుచిరాం కోటిబ్రహ్మాండభూషితామ్ |
కందర్పకోటిలావణ్యాం బాలాం వందే శివప్రియామ్ || 1 ||
వహ్నికోటిప్రభాం సూక్ష్మాం కోటికోటిసహేలినీమ్ |
వరదాం రక్తవర్ణాం చ బాలాం వందే సనాతనీమ్ || 2 ||
జ్ఞానరత్నాకరాం భీమాం పరబ్రహ్మావతారిణీమ్ |
పంచప్రేతాసనగతాం బాలాం వందే గుహాశయామ్ || 3 ||
పరాప్రాసాదమూర్ధ్నిస్థాం పవిత్రాం పాత్రధారిణీమ్ |
పశుపాశచ్ఛిదాం తీక్ష్ణాం బాలాం వందే శివాసనామ్ || 4 ||
గిరిజాం గిరిమధ్యస్థాం గీః రూపాం జ్ఞానదాయినీమ్ |
గుహ్యతత్త్వపరాం చాద్యాం బాలాం వందే పురాతనీమ్ || 5 ||
బౌద్ధకోటిసుసౌందర్యాం చంద్రకోటిసుశీతలామ్ |
ఆశావాసాం పరాం దేవీం వందే బాలాం కపర్దినీమ్ || 6 ||
సృష్టిస్థిత్యంతకారిణీం త్రిగుణాత్మకరూపిణీమ్ |
కాలగ్రసనసామర్థ్యాం బాలాం వందే ఫలప్రదామ్ || 7 ||
యజ్ఞనాశీం యజ్ఞదేహాం యజ్ఞకర్మశుభప్రదామ్ |
జీవాత్మవిశ్వజననీం బాలాం వందే పరాత్పరామ్ || 8 ||
ఇత్యేతత్పరమం గుహ్యం నామ్నా ముక్తావలీస్తవమ్ |
యే పఠంతి మహేశాని ఫలం వక్తుం న శక్యతే || 9 ||
గుహ్యాద్గుహ్యతరం గుహ్యం మహాగుహ్యం వరాననే |
విద్యార్థీ లభతే విద్యాం ధనార్థీ లభతే ధనమ్ || 10 ||
కన్యార్థీ లభతే కన్యాం మోక్షార్థీ మోక్షమాప్నుయాత్ |
బహునాత్ర కిముక్తేన చింతామణిరివాపరమ్ || 11 ||
గోపనీయం ప్రయత్నేన గోపనీయం న సంశయః |
అన్యేభ్యో నైవ దాతవ్యం కిమన్యచ్ఛ్రోతుమిచ్ఛసి || 12 ||
ఇతి శ్రీవిష్ణుయామలే శ్రీ బాలా ముక్తావలీ స్తోత్రమ్ |
[download id=”399718″]
