శ్రీ లక్ష్మీ స్తోత్రం (లోపాముద్రా కృతం)

మాతర్నమామి కమలే పద్మాఽఽయతసులోచనే |
శ్రీవిష్ణుహృత్కమలస్థే విశ్వమాతర్నమోఽస్తు తే || 1 ||
క్షీరసాగరసత్పుత్రి పద్మగర్భాభసుందరి |
లక్ష్మి ప్రసీద సతతం విశ్వమాతర్నమోఽస్తు తే || 2 ||
మహేంద్రసదనే త్వం శ్రీః రుక్మిణీ కృష్ణభామినీ |
చంద్రే జ్యోత్స్నా ప్రభా సూర్యే విశ్వమాతర్నమోఽస్తు తే || 3 ||
స్మితాననే జగద్ధాత్రి శరణ్యే సుఖవర్ధిని |
జాతవేదసి దహనే విశ్వమాతర్నమోఽస్తు తే || 4 ||
బ్రహ్మాణి త్వం సర్జనాఽసి విష్ణౌ త్వం పోషికా సదా |
శివే సంహారికా శక్తిర్విశ్వమాతర్నమోఽస్తు తే || 5 ||
త్వయా శూరో గుణీ విజ్ఞో ధన్యో మాన్యః కులీనకః |
కలాశీలకలాపాఢ్యో విశ్వమాతర్నమోఽస్తు తే || 6 ||
త్వయా గజస్తురంగశ్చ స్త్రైణస్తృణం సరః సదః |
దేవో గృహం కణః శ్రేష్ఠా విశ్వమాతర్నమోఽస్తు తే || 7 ||
త్వయా పక్షీ పశుః శయ్యా రత్నం పృథ్వీ నరో వధూః |
శ్రేష్ఠాః శుద్ధా మహాలక్ష్మి విశ్వమాతర్నమోఽస్తు తే || 8 ||
లక్ష్మి శ్రీ కమలే పద్మే రమే పద్మోద్భవే సతి |
అబ్ధిజే విష్ణుపత్ని త్వం ప్రసీద సతతం ప్రియే || 9 ||
ఇతి శ్రీలక్ష్మీనారాయణసంహితాయాం లోపాముద్రా కృత శ్రీ లక్ష్మీ స్తోత్రమ్ |

[download id=”400049″]