దకారాది శ్రీ దత్తాత్రేయాష్టోత్తరశతనామ స్తోత్రం
దత్తం వందే దశాతీతం దయాబ్ధి దహనం దమమ్ |
దక్షం దరఘ్నం దస్యుఘ్నం దర్శం దర్పహరం దవమ్ || 1 ||
దాతారం దారుణం దాంతం దాస్యాదం దానతోషణమ్ |
దానం దానప్రియం దావం దాసత్రం దారవర్జితమ్ || 2 ||
దిక్పం దివసపం దిక్స్థం దివ్యయోగం దిగంబరమ్ |
దివ్యం దిష్టం దినం దిశ్యం దివ్యాంగం దితిజార్చితమ్ || 3 ||
దీనపం దీధితిం దీప్తం దీర్ఘం దీపం చ దీప్తగుమ్ |
దీనసేవ్యం దీనబంధుం దీక్షాదం దీక్షితోత్తమమ్ || 4 ||
దుర్జ్ఞేయం దుర్గ్రహం దుర్గం దుర్గేశం దుఃఖభంజనమ్ |
దుష్టఘ్నం దుగ్ధపం దుఃఖం దుర్వాసోఽగ్ర్యం దురాసదమ్ || 5 ||
దూతం దూతప్రియం దూష్యం దూష్యత్రం దూరదర్శిపమ్ |
దూరం దూరతమం దూర్వాభం దూరాంగం చ దూరగమ్ || 6 ||
దేవార్చ్యం దేవపం దేవం దేయజ్ఞం దేవతోత్తమమ్ |
దేవజ్ఞం దేహినం దేశం దేశికం దేహిజీవనమ్ || 7 ||
దైన్యం దైన్యహరం దైవం దైన్యదం దైవికాంతకమ్ |
దైత్యఘ్నం దైవతం దైర్ఘ్యం దైవజ్ఞం దైహికార్తిదమ్ || 8 ||
దోషఘ్నం దోషదం దోషం దోషిత్రం దోర్ద్వయాన్వితమ్ |
దోషజ్ఞం దోహపం దోషేడ్బంధుం దోర్జ్ఞం చ దోహదమ్ || 9 ||
దౌరాత్మ్యఘ్నం దౌర్మనస్యహరం దౌర్భాగ్యమోచనమ్ |
దౌష్టత్ర్యం దౌష్కుల్యదోషహరం దౌర్హృద్యభంజనమ్ || 10 ||
దండజ్ఞం దండినం దండం దంభఘ్నం దంభిశాసనమ్ |
దంత్యాస్యం దంతురం దంశిఘ్నం దండ్యజ్ఞం చ దండదమ్ || 11 ||
అనంతానంతనామాని సంతి తేఽనంతవిక్రమ |
వేదోఽపి చకితో యత్ర నృర్వాగ్ హృద్దూర కా కథా || 12 ||
ఇతి శ్రీపరమహంస పరివ్రాజకాచార్య శ్రీవాసుదేవానందసరస్వతీ విరచితం దకారాది దత్తాత్రేయాష్టోత్తరశతనామ స్తోత్రమ్ |
[download id=”400260″]
