శ్రీ సౌలభ్యచూడామణి స్తోత్రం
బ్రహ్మోవాచ |
చక్రాంభోజే సమాసీనం చక్రాద్యాయుధధారిణమ్ |
చక్రరూపం మహావిష్ణుం చక్రమంత్రేణ చింతయేత్ || 1 ||
సర్వావయవసంపూర్ణం భయస్యాపి భయంకరమ్ |
ఉగ్రం త్రినేత్రం కేశాగ్నిం జ్వాలామాలాసమాకులమ్ || 2 ||
అప్రమేయమనిర్దేశ్యం బ్రహ్మాండవ్యాప్తవిగ్రహమ్ |
అష్టాయుధపరీవారం అష్టాపదసమద్యుతిమ్ || 3 ||
అష్టారచక్రమత్యుగ్రం సంవర్తాగ్నిసమప్రభమ్ |
దక్షిణైర్బాహుభిశ్చక్రముసలాంకుశపత్రిణః || 4 ||
దధానం వామతః శంఖచాపపాశగదాధరమ్ |
రక్తాంబరధరం దేవం రక్తమాల్యోపశోభితమ్ || 5 ||
రక్తచందనలిప్తాంగం రక్తవర్ణమివాంబుదమ్ |
శ్రీవత్సకౌస్తుభోరస్కం దీప్తకుండలధారిణమ్ || 6 ||
హారకేయూరకటకశృంఖలాద్యైరలంకృతమ్ |
దుష్టనిగ్రహకర్తారం శిష్టానుగ్రహకారిణమ్ || 7 ||
ఏవం సౌదర్శనం నిత్యం పురుషం హృది భావయేత్ |
సౌలభ్యచూడామణ్యాఖ్యం మయా భక్త్యా సమీరితమ్ || 8 ||
చూడాయుక్తం త్రిసంధ్యాయాం యః పఠేత్ స్తోత్రముత్తమమ్ |
భయం చ న భవేత్తస్య దురితం చ కదాచన || 9 ||
జలే వాఽపి స్థలే వాఽపి చోరదుఃఖమహాపది |
సంగ్రామే రాజసంమర్దే శత్రుభిః పరిపీడితే || 10 ||
బంధనే నిగలే వాఽపి సంకటేఽపి మహాభయే |
యః పఠేత్ పరయా భక్త్యా స్తోత్రమేతజ్జితేంద్రియః |
సర్వత్ర చ సుఖీ భూత్వా సర్వాన్ కామానవాప్నుయాత్ || 11 ||
ఇతి శ్రీ సౌలభ్యచూడామణి స్తోత్రమ్ |
[download id=”399880″]
